తమిళ స్టార్ హీరో విజయ్ నటించిన ‘జన నాయగన్’ సినిమా ఇంటర్నెట్లో లీక్ అయిన కేసులో కీలక పురోగతి లభించింది. ఈ కేసుకు సంబంధించి ప్రధాన నిందితుడితో సహా మరో ముగ్గురిని అరెస్ట్ చేసినట్లు తమిళనాడు సైబర్ క్రైమ్ వింగ్ పోలీసులు గురువారం వెల్లడించారు. దీంతో ఈ కేసులో ఇప్పటివరకు అరెస్టయిన వారి సంఖ్య తొమ్మిదికి చేరింది.
పోలీసులు తెలిపిన వివరాల ప్రకారం, ఈ కేసులో ప్రధాన నిందితుడు మరో సినిమాకు ఫ్రీలాన్స్ అసిస్టెంట్ ఎడిటర్గా పనిచేస్తున్నాడు. అయితే, ఎడిటింగ్ స్టూడియోలో ఉన్న ‘జన నాయగన్’ సినిమా రీల్స్కు అనధికారికంగా యాక్సెస్ సంపాదించి, డేటాను దొంగిలించాడు. ఆ తర్వాత ఆ డేటాను పూర్తి సినిమాగా మార్చి, సహ నిందితులతో పంచుకున్నాడు. వారి ద్వారా ఈ పైరసీ కాపీ ఆన్లైన్లో సర్క్యులేట్ అయింది.
డిజిటల్ ఆధారాలను క్షుణ్ణంగా పరిశీలించి, సాంకేతిక విశ్లేషణ జరిపిన తర్వాత ఈ ముగ్గురిని అరెస్ట్ చేసినట్లు సైబర్ క్రైమ్ విభాగం పేర్కొంది. అరెస్టయిన నిందితులను కోర్టులో హాజరుపరచగా, వారికి జ్యుడీషియల్ కస్టడీ విధించారు.
ఈ సందర్భంగా పోలీసులు ప్రజలకు కీలక సూచనలు చేశారు. పైరసీ కంటెంట్ను డౌన్లోడ్ చేయడం, చూడటం లేదా ఇతరులకు షేర్ చేయడం వంటివి చేయవద్దని హెచ్చరించారు. డిజిటల్ పైరసీలో ఏ విధంగా పాలుపంచుకున్నా కఠినమైన చట్టపరమైన చర్యలు తప్పవని స్పష్టం చేశారు. పైరసీకి సంబంధించిన అనుమానిత లింకులు కనిపిస్తే వెంటనే తమకు సమాచారం ఇవ్వాలని ప్రజలను కోరారు. హెచ్. వినోద్ దర్శకత్వం వహించిన ఈ చిత్రంలో విజయ్ సరసన పూజా హెగ్డే నటించారు. సినిమా విడుదలకు ముందే లీక్ కావడం సినీ వర్గాల్లో తీవ్ర కలకలం రేపింది.
